Кафедра беларускага і супастаўляльнага мовазнаўства філалагічнага факультэта адзначыла Дзень роднай мовы ў фармаце сустрэчы з пісьменнікамі Гродзенскага абласнога аддзялення Саюза пісьменнікаў Беларусі.

23 февраля 2015

19 лютага кафедра беларускага і супастаўляльнага мовазнаўства філалагічнага факультэта адзначыла Дзень роднай мовы ў фармаце сустрэчы з пісьменнікамі Гродзенскага абласнога аддзялення Саюза пісьменнікаў Беларусі. “Ад слова вырастаюць крылы” – пад такім матывам прайшла ўрачыстая святочная імпрэза, якая сабрала шмат прыхільнікаў роднага слова: школьнікаў і студэнтаў, выкладчыкаў і паэтаў – усіх, хто неабыякавы да лёсу Мовы, да велічнай місіі і чароўнага хараства Слова.

З прывітальным словам да гасцей і прысутных звярнуліся дэкан філалагічнага факультэта Іна Самсонаўна Лісоўская і загадчык кафедры беларускага і супастаўляльнага мовазнаўства Алена Станіславаўна Садоўская. Дацэнт Н.Э.Шандроха разам са студэнтамі-выпускнікамі спец. “Беларуская філалогія” падарылі некалькі імгненняў Яе Вялікасці Рыторыкі, а прафесар кафедры М.А.Даніловіч падзяліўся цікавымі статыстычнымі звесткамі адносна месца і ролі беларускай мовы ў айчынным і сусветным кантэксце.

Душэўна пранікнёныя і духоўна глыбокія, самабытныя і неардынарныя, прагучалі вершы на беларускай і рускай мовах у выкананні рупліўцаў роднага слова старшыні Гродзенскага Саюза пісьменнікаў Беларусі Людмілы Кебіч, паэтэс Алы Нікіпорчык і Алены Руцкай, паэта-авангарда Дзмітрыя Радзівончыка. Слухачы мелі шыкоўную магчымасць адчуць, што хіба толькі паэт і можа зблізіць найаддаленае, дзе кожнае слова мае свой і колер, і смак, і водар.

Дацэнты кафедры беларускай літаратуры А.Э.Сабуць і П.І.Маляўка прапанавалі некалькі эскізаў літаратурнага і песеннага гучання беларускага слова. Парадавалі залу і прыгожыя песні (народныя і нават бардаўскія) на беларускай, польскай і ўкраінскай мовах у выкананні студэнтаў спец. “Беларуская філалогія”.

Усе прысутныя дакрануліся да хараства Слова, да таемнай музыкі слоў у Паэзіі – сапраўднага МАСТАЦТВА, у якім жывуць філолагі і іхнія прыхільнікі. Невыпадкова напрыканцы ўсе разам выканалі вядомую песню “Простыя словы”. З заклікам любіць і шанаваць РОДНЫЯ ПРОСТЫЯ СЛОВЫ.